天主教中有所謂七大罪，分別係傲慢、嫉妒、憤怒、怠惰、貪婪、暴食同色慾，講真現代人或多或少都中兩、三項，不過近日日本Twitter就流傳一組新嘅「現代七大罪」，就幾乎每個人都會中哂七樣。大家快啲睇下呢「現代七大罪」係咩，然後返去懺悔啦下！

余裕で七つの大罪犯す自信しかない pic.twitter.com/ZWQlpgv9HA

— 1号（とり）????????ekot Tシャツプリントロボット???? (@ekot_TORI) April 13, 2023

卻說專門製作客製T恤嘅日本店舖「ekot」嘅其中一個Twitter帳號「1号（とり）ekot Tシャツプリントロボット (@ekot_TORI)」，上月時分享咗佢哋出嘅T恤印花，言簡意賅地列出「現代七大罪」，分別係漫畫、零食、杯麵、智能電話、貓、床鋪以及遊戲機，由於太過符合日本網民嘅現實生活而成為一時熱話，至今已有超過170萬次觀看、近16萬個讚好。大家都高呼「我有罪！」

順帶一提，件衫於minne上有得買，3,900Yen一件。

「現代七大罪」中，智能電話幾乎係無可避免，床舖 (瞓覺) 亦冇人會話「戒咗」，而漫畫、遊戲就更加係唔少人嘅工餘嗜好，唯有就係零食、杯麵同埋貓相對地較為「易避免」，不過一旦「沉迷」就絕對難以自拔。而且除咗貓之外，其餘六項的確會對生活造成不良影響，所以「現化七大罪」可謂既搞笑又真實。

不過亦有非常冷靜嘅網民表示，現代七大罪其實都係「怠惰」，所以嚴格上係「一大罪」黎。不過點理解我就交返畀各位自行決定，冇咩事我返出去食住零食撚住貓黎懺悔先啦。

資料來源：minne