由James Cameron監製及編劇、改編自日本漫畫家木城幸人同名漫畫嘅《銃夢：戰鬥天使 (Alita: Battle Angel)》於2019年上映之後，雖然深得部份觀眾喜愛，但票房就未如預期。加上發行商20th Century Fox於電影上映後一個月就被Disney收購，令唔少觀眾都認為電影續集計劃就此被擱置。

不過近日James Cameron似乎就確認咗即將會開拍《Alita》續集，而更令人意外嘅係，消息竟然係因為佢放售價值3300萬美金嘅加州大宅而傳出。 

圖片：IMDB

卻說James Cameron早前放售其位於加州海邊、24年前買落，現叫價3300萬美金嘅大宅，並吸引到財經媒體《The Forbes》前去訪問。訪問中除咗提到間屋有幾大、幾豪華之外，亦提到Cameron一家於大宅內生活咗廿幾年嘅回憶，以及會放售嘅原因。James Cameron表示：「三個細路都幾乎搬哂出去自己住。而《Avatar》又喺 (紐西蘭) 威寧頓以及洛杉磯拍、《Alita》嘅話就係去德州奧斯汀拍，咁就冇理由仲Keep住呢個地方啦。」

James Cameron提到嘅《Avatar》拍攝，應該係講緊去年9日宣佈正式開拍嘅《Avatar 4》，而《Forbes》嘅訪問中亦提到James Cameron於訪問後第二日就要飛返紐西蘭繼續拍攝，換言之《Avatar 4》嘅拍攝仍在進行中。所以《Alita》嘅拍攝好可能會緊接於《Avatar 4》後開始。

James Cameron放售嘅大宅

2019年上映嘅《Alita》雖然票房僅得4.05億美金，大約於回本與蝕錢之間，但就收獲一班忠實影迷，加上第一集結尾明顯係為續集鋪路，所以Fans們一直都期待續集嘅消息。而電影導演Robert Rodriguez於今年初時亦提到，James Cameron已經寫好第二、三集嘅故事大綱，只需要再作修改就完成劇本，但就未確認是否會真正開拍。今次James Cameron就算係首次確認《Alita》續集進入製作日程。

資料來源：Forbes