相信各位都知日本係一個充滿各類「牌照」、「檢定」嘅地方，除咗香港都會有嘅車牌、船牌、保險會計之類嘅專業人士執照外，連電競選手、職業麻雀等都要考牌，甚至浸溫泉、睇戲、忍者等各種嗜好都一樣有「牌 (檢定)」可以拎。但近日有日本網民於Twitter分享咗一個非常特別嘅「牌照」，原來連「單身狗」都有牌可以拎！

役所で発行できる「証明書」のうち最も屈辱的なものを発行してきた pic.twitter.com/NgLyChDGpA

— いぐぞー！！ ✈️ 旅するプログラマー (@igz0) July 10, 2023

卻說旅行情報推主「いぐぞー！！ ✈️ 旅するプログラマー (@igz0)」，於本週一時更新Twitter，表示佢從市政府中拎到一張「最屈辱嘅證明書」，並貼出一張「獨身證明書」嘅照片。帖文發佈後大量日本網民都表示係第一次見，而且睇到張圖就已經佢哋非常心痛，而且仲好好奇呢張「單身狗證明書」究竟有咩用。

據推主透露，佢申請呢張「獨身證明書」其實係為咗報名加入「婚姻相談所 (婚姻介紹所)」，相信係主辦法為咗保障自己及其他參加者，所以要求所有參加者都要提交證明自己未婚嘅官方證明文件。

香港嘅無結婚紀錄證明書，俗稱「寡佬證」

圖片：網上圖片

而據網上資料顯示，日本部份地方政府都會要求於當地註冊嘅新人提供「獨身證明」，以確保兩人嘅婚姻為合法。另外假如身為香港人嘅你打算同日本人結婚、甚或係兩個香港人想去日本註冊，亦需要向香港入境處申請一份「無結婚紀錄證明書」，亦即香港版嘅「獨身證明」，又有人將其稱為「寡佬證」。