Disney近年熱愛將經典「公主動畫電影」改編成真人版，但同時又強行加入大量宣揚兩性、種族平等嘅「覺醒 (woke)」概念，搞到唔少動畫版Fans都非常不滿。而近日加入反對大軍嘅，就仲有原版《白雪公主》動畫師David Hand兒子、本身亦曾係Disney設計師嘅David Hand II，佢近日接受訪問指，如果佢老豆同Walt Disney本人知道《白雪公主》被人咁改編，「死咗都被人激翻生！」

Rachel Zegler近一年前嘅紅地毯訪問

早前曝光嘅Rachel Zegler白雪公主造型

真人版《白雪公主》自公佈以來就一直備受關注及批評。例如搵黎擁有健康膚色嘅Rachel Zegler飾演「白雪公主」、將「七個小矮人」改編成「七隻魔法生物」等，都被批評太過「政治正確」。而近日，網上又再流傳Rachel Zegler於一年前某個紅地毯訪問時，頗為輕挑地嘲諷原版「明顯好舊」、「原版主要係講白雪公主與一個跟縱狂嘅愛情故事，好奇怪囉！所以我哋今次唔會咁拍啦！」，結果再引起原版Fans反感。

而近日英國《Telegraph》訪問到原版動畫師David Hand嘅同名兒子David Hand，佢表示新版嘅改編對於原版係「侮辱」及「過份政治正確」，並為原版辯解：「原版係以當時嘅大家嘅喜好製作…我唔同意依家呢個新概念…但我知Disney係進入咗呢個 (政治正確) 模式。」

David Hand (父) 

圖片：Disney

佢亦批評新版《白》嘅改編令原版蒙羞：「新版就係拎啲以前好成功嘅嘢，然後試圖整啲新嘢出黎。佢哋更改咗個故事，更改咗角色嘅思考過程，咁就已經唔係原本嗰個故事。然後又作咗啲『覺醒』嘢入去，我就唔係咁鍾意囉！老實講，我覺得佢哋依家做嘅嘢，係侮辱緊啲經典電影，對於我爸爸及Walt Disney一定都唔尊重…我覺得佢哋喺棺材入面都唔安樂。」David Hand亦提議Disney唔好再搞啲經典原作：「揀過第二啲故仔、創造新嘅角色，但唔好糟蹋啲經典、美好嘅作品。」