世界知名嘅日本動畫片商吉卜力工作室近日宣佈，將會接受日本電視台 (NTV) 收購部份股份，未來會成為NTV旗下嘅子公司。而喺吉卜力及出嘅公告中，創辦人之一兼現任社長鈴木敏夫就表示，「將公司交畀外人係更好嘅選擇」。

吉卜力工作室自1985年成立以來就以宮崎駿、鈴木敏夫等創辦人為首營運至今。但近40年過去後，雖然宮崎駿仍以82歲高齡處於創作前線，75歲嘅鈴木敏夫亦仍然擔任社長，但無可否認佢哋都已經步入人生晚年，係時候為身後事作出打算。過往坊間一直認為宮崎駿嘅長子、曾參與三宅之森吉卜力美術館設計、擔任《地海戰記》導演並參加宮崎駿最新作《蒼鷺與少年》嘅宮崎吾朗將會成為繼任者，但吉卜力近日發出嘅公告就指，宮崎吾朗堅稱「難以單靠自己接手吉卜力，最好都係將公司嘅未來交畀外人」，所以決定尋求外部協助。

杉山美邦 (左) 與 鈴木敏夫 (右)

圖片：吉卜力工作室

公告亦指出，今次收購案係鈴木敏夫於某次溫泉旅行時，主動向有多年合作經驗嘅NTV社長杉山美邦提出。鈴木敏夫希望杉山美邦及NTV能夠幫忙管理吉卜力，令吉卜力自己能夠專注於作品製作。而杉山美邦亦指，將吉卜力收歸旗下有助提升NTV嘅企業價值，並承諾會尊重吉卜力，永久保存其工匠精神及品牌價值。

資料來源：吉卜力工作室