又有新嘅安妮亞表情包可以用喇，WakuWaku！

隨住《SPY×FAMILY》第二季動畫將於10月7日播出，官方日前公開正式預告，同時解禁片頭及片尾兩首主題曲。其中OP片頭曲〈クラクラ〉將由Ado領唱，並邀請到meiyo填詞作曲，以及曾製作《星際牛仔》配樂嘅菅野洋子 x SEATBELTS 編曲及演奏，而ED片尾曲〈トドメの一撃〉則由Vaundy及Cory Wong聯手製作。

第二季動畫將改編自原著第4～7卷，以「豪華郵輪篇」為主軸，講述洛伊德終於同約兒單獨約會，一齊去高級餐廳食飯、湖上划船、到爵士酒吧聽歌等等，安妮亞同弗朗基更尾隨兩人暗中觀察，同時唔少得安妮亞喺伊甸園學院嘅生活日常，為取得好成績埋頭苦幹。

另外，原創劇場版電影《SPY×FAMILY CODE: White》將於12月22日於日本上映，但香港方面暫時未有上映消息。