由Eddie Redmayne主演嘅《哈利波特》前傳電影系列《怪獸與牠們的產地》（Fantastic Beasts）原定計劃推出五部曲，但由於最新一集《怪獸與鄧不利多的秘密》票房未如預想，全球僅收4.07億美票房（成本2億美元），令唔少哈迷都擔心呢個IP能夠得以延續。最近David Yates就喺節目上爆料，表示《怪獸》系列本來只計劃拍攝三集，而華納兄弟目前亦已擱置製作。

曾執導過4部《哈利波特》及3部《怪獸》系列嘅David Yates日前於Podcast節目「Inside Total Film」表示，《怪獸》系列原定只計劃拍攝三集，但因為《哈利波特》原作者兼《怪獸》系列編劇J.K.羅琳於《怪獸1》放映上自發宣布：「《怪獸》總共會有五集」，所以外界以為呢個系列會發展成五部曲。當時佢同其他劇組成員都打咗個突，因為完全冇人同佢哋講過會呢個系列會變成五部曲，而華納兄弟亦一直冇承認或否認J.K.羅琳嘅說法。

除此之外，David Yates非常自豪團隊能夠喺疫情期間完成《怪獸與鄧不利多的秘密》拍攝，同時宣布自己將暫別魔法世界：「拍攝完《鄧不利多的秘密》後，我哋都為呢部電影感到相當自豪，當電影正式問世後，我哋需要暫時停下腳步，好好休息一下。」

至於《怪獸》系列會點樣收尾，David Yates坦言：「我仲未同J.K.羅琳、監製David Heyman以及華納兄弟討論，目前就此擱置。咁樣都好嘅，令我有時間可以拍攝《沉默騙局》（本周上映嘅Netlfix新作）呢類電影，但我相信喺未來某個時間點，Newt將會回歸，呢啲嘢話唔埋嘅！但我哋確實冇就此深入討論過。」

資料來源：THR