為防範女乘客遭到性騷擾，唔少地方嘅鐵路公司都會設立「女性專用車廂」。然而，最近日本就有非牟利組織設立「男性專用車廂」，希望藉此向社會傳達男性搭車時亦面臨各種焦慮及壓力，例如被誤認為電車痴漢。大家覺得香港應唔應該效仿呢？

據《產經新聞》報導，日本非牟利組織「日本弱勢男性中心（日本弱者男性センター）」為慶祝11月19日國際男人節，將於本月18日租下一列櫻花路面電車（都電荒川線）增設「男性專用車廂」，旨在提醒社會大眾男性喺電車上同樣面臨各種焦慮及壓力，並讓大眾意識到社會存在「男性總是優於女性」及「男性總是性犯罪加害者」等刻板印象，藉此推廣兩性平等。活動將於11月18日下午1時從東京荒川區三之輪橋站出發，並於1時50分到達新宿區的早稻田站。

《儘管如此 我沒做過》劇照

事實上，「痴漢冤罪」係日本老生常談嘅問題，男性一旦被女乘客指控性騷擾，人生基本上已經完左一半。一嚟定罪率極高，二嚟就算最後能證明自己清白，冗長嘅司法程序亦會令人失去工作、聲譽盡毀。因此網絡上流傳一種說法，無論有冇真係「咸豬手」，一旦被懷疑係痴漢就要馬上逃離現場，而年中亦確實有唔少「痴漢」冒住生命危險跳軌逃跑，有保險公司更推出「痴漢保險」，向冤罪受害者提供聯絡律師及事後對應等服務。