隨住任天堂Nintendo Switch踏入第7個年頭，有關Switch 2嘅傳聞多得不可勝數，令任天堂社長都要出面闢謠，表明今個財政年度（2023年4月至2024年3月）並唔會推出任何新硬件，唔少網民就將呢番說話解讀為「Switch 2將於2024年下半年推出」，甚至有爆料指Switch 2將於今年9月推出。然而，呢啲「消息」都只係傳聞或推測，但可以確定嘅係，開發者們已著手為Switch後續機型製作遊戲。

最近遊戲開發者大會（GDC）主辦方匿名訪問咗3,000多名遊戲開發者，其中有一題就問到「目前正為邊個平台開發遊戲？」，多達66%開發者表示正在製作PC遊戲，其次分別係PS5（35%）、Xbox Series X/S（34%）、iOS（23%）以及Switch（18%）等等，當中最令人驚訝嘅係，有250名開發者（8%）正為Switch後續機型製作遊戲，考慮到開發者有簽署保密協議，實際人數可能會更多。

根據最新傳聞，Switch 2將搭載NVIDIA嘅T239晶片，配備8GB RAM及64GB儲存空間，電池續航力亦將大幅提升，螢幕更新率則提高至120Hz，而售格亦會上升至399美元（約$3,120港元）。