隨住《Dune: Part Two（沙丘瀚戰：第二章）》將於本月底上映，導演Denis Villeneuve日前接受《Time》雜誌訪問時透露，目前華納兄弟尚未拍板製作第三集，但就算繼續拍落去，佢都打算拍完第三集《Dune Messiah》就離開沙丘系列。

去年12月Denis Villeneuve曾表示已著手撰寫《沙丘瀚戰3》劇本，預計會改編自原著小說第二本書《Dune Messiah》，但由於後續小說相當深奧，所以打算拍到第三集就收手，能夠成功製作《沙丘瀚戰》三部曲已足以圓夢，即使原著小說仲有4本書尚未改編。

與此同時，主演們亦非常樂意回歸第三部《沙丘瀚戰》，其中Zendaya就毫不猶豫答應回歸：「每當Denis打電話嚟，我都會答應，我好期待故事發展。我係從原著小說《Dune Messiah》開始睇起，但後來發現我哋只係拍緊第一部小說，於是即刻走左去補睇返第一部，資訊量實在太龐大，但冇人比Denis更熱愛呢個系列。」而另一位主演Timothée Chalamet亦表示：「如果有對的時間及機會完成《Dune Messiah》呢個故事，我諗我哋都非常樂意回歸。」

值得一提嘅係，Denis Villeneuve曾表示過去6年佢都專注於製作《沙丘瀚戰》第一及第二集，所以希望喺製作第三集前拍下其他作品理清思緒，換言之華納兄弟落實開拍《沙丘瀚戰3》，Denis Villeneuve都可能唔會馬上投入製作。