新一季F1將於2月29日開戰，而為配合新賽季展開，LEGO亦將於3月1日一口氣推出三款F1 LEGO，當中包括去年Mercedes嘅「黑箭」戰車「W14E Performance」、同樣來自上賽季嘅McLaren戰車，以及著名車手冼拿（Aryton Senna）駕駛嘅經典McLaren戰車MP4/4。

先講「黑箭」。呢款編號42171嘅「Mercedes AMG F1 W14 E Performance」，顧名思義就係參照上季Mercedes車隊嘅賽車而設計，而且屬於LEGO Technics系列，還原度極高之餘亦係三款F1模型中最大嘅（長63cm x 寬26cm x 高13cm）。除咗還原車身線條、塗裝之外，模型嘅前後輪亦配上LEGO少見嘅「光頭胎」以及完整嘅懸掛系統，亦可以用車頂旋鈕控制控制前輪指向，同時後翼亦能與真實賽事中嘅「DRS」系列一樣打開。不過數到最驚艷嘅，相信就係引擎部份。打開引擎蓋後可以見到透明外殼、有差速器及有可動活塞嘅引擎部份。

「Mercedes AMG F1 W14 E Performance」美國官網售價為219.99美金，約HK$1,720。

至於編號10330嘅MP4/4就屬於重演經典地標或文化象徵嘅「LEGO Icons」系列。論Size比上面嘅「W14」細一個碼（長32cm、寬17cm、高12cm），細節上亦略有取捨，但依然有多連桿懸掛、可調尾翼、光頭胎、後照鏡，以及打開引擎蓋就見到嘅Turbo V6引擎。重點係仲送Aryton Senna嘅LEGO公仔一個，擺明係針對一班年資有返咁上下嘅F1車迷。

McLaren MP4/4 & Ayrton Senna 美國官網售價為79.99美金，約HK$625。

而編號76919嘅「2023 McLaren Formula 1 Race Car」就擺到明係低齡向，上面講嗰啲咩識郁嘅懸掛、尾翼、引擎通通都無，將一切心思都放哂喺還原個樣到。但佢同時亦係三款中體積最細（長19cm x 寬7cm x 高4cm），以及最平嘅，只售26.99美金，即約HK$210左右。

資料來源：LEGO