台灣啦啦隊女神離開「樂天女孩」嘅消息近來一直甚囂塵上，到今日中華職棒球隊「味全龍」就正式公佈林襄會加盟其旗下啦啦隊「Dragon Beauties 小龍女」，並將於3月30日首次以「小龍女」身份亮相球場。

圖片：dragon_beauties_official

現年26歲嘅林襄於2021年加入「樂天女孩」，之後就憑其甜美外表、姣好身材以及不時嘅性感寫真瞬速成為紅篇港台嘅啦啦隊女神，除咗於台灣有多個代言廣告之外，近兩年亦頻頻到港出席各種商業活動，去年更獲日本著名少年雜誌《週刊Playboy》邀約拍攝寫真，又曾到日本仙台為日本職棒東北樂天金鷲擔任開球嘉賓，成為近年少數能「反攻」日本嘅台灣女星。

雖說場外工作繁忙，但林襄一直都有兼顧「樂天女孩」嘅啦啦隊工作，不過自去年下半季起其出場率就大降，半季中僅得六次，其離隊新聞亦因而冒起。直到本月中時先係其攝影師兼經理人「莉奈」被發現接管整隊「小龍女」，2月16日時「樂天女孩」亦正式官宣林襄離隊，最後味全龍於今日官宣林襄加盟。

林襄早前於香港出席活動

圖片：95_mizuki

「小龍女」嘅官方IG於今日正式發佈林襄加盟嘅消息，並指林襄小時候於台北市士林區長大，亦有親友於士東市場工作，所以對於味全龍主場所在嘅天母（士林附近）非常熟悉，今次加盟算係「龍躍返鄉」。