透過交友軟件認識異性，除咗外貌、性格及社經地位等條件，興趣嗜好亦係非常重要嘅一環，影響到兩人有冇共同話題及經歷，能否快速拉近彼此之間距離。最近日本有交友軟件就做咗個調查，了解男士及女士最鍾意異性有咩嘢嗜好，結果顯示大部份女士都認為男士識得尋找美食最具吸引力。

最近日本交友軟件Matching App University訪問咗215名年齡介乎18至49歲嘅未婚用戶（122男、93女），了解佢哋認為異性具備那些興趣嗜好最具吸引力。結果顯示對女性而言，異性最具吸引力嘅Top5嗜好分別為「鍾意尋找美食/掃街」(33.3%)、「烹飪」(29%)、「睇電影」(28%)、「旅行」(23.7)以及「聽音樂」(22.6%)。其中有部份女士認為，如果異性對尋找美食感興趣，咁就好容易可以約出嚟品嚐唔同美酒及佳餚，而且如果對方鍾意烹飪，日後結婚仲可以一齊煮飯。

至於對男性而言，異性最具吸引力嘅Top5嗜好分別為「烹飪」(36.1%)、「睇電影」(31.1%)、「打機」(23%)、「睇漫畫」(18%)以及「喜歡動物」(17.2%)。開講有話「入得廚房出得廳堂」（嗱，絕對冇貶低女性嘅意思，男人都可以煮飯做家頭細務），如果對象鍾意煮嘢食，某程度可以確保第時結咗婚可以食得好啲又健康啲，唔使日日煩食咩外賣，所以好自然會加分。若然對方睇意睇電影、打機、睇漫畫，咁就唔使怕第時會聽到「你咁大個人仲打咩機呀？成熟少少得唔得？」呢類說話，仲可以陪你一齊過關斬將，討論漫畫劇情。

除此之外，調查仲訪問咗受訪者認為異性具備那些嗜好最反感。對女性而言，異性最反感嘅Top5嗜好分別「柏青哥/老虎機」(76.3%)、「麻雀」(53.8%)、「飲酒/酗酒」(22.6%)、「打機」(14%)以及「wargame」(12.9%)。主要原因在於女士認為以上活動好花錢(31.2%)，前兩者因為涉及賭博成分，所以唔難理解女士為何感到反感，而飲酒除咗花錢，仲可能涉及到酒吧及夜場等地方消遣，而大多數女士都唔希望另一半去呢啲地方，因此投下反感一票。

至於對男性而言，異性最反感嘅Top5嗜好分別「飲酒/酗酒」、「化妝品」、「時尚/購物」、「打機」以及「水肺潛水/水費活動」。主要原因係男士們覺得同自身興趣不符(27.1%)以及上述活動感覺好花錢(16.4%)，其中有男士受訪者就表示：「如果自己嘅興趣同對方唔夾，交往時冇辦法一齊開心度過。」、「迎合對方嘅需求有時好辛苦。」可以理解成男士好難迎合沒有共同嗜好嘅異性，唔知大家又有咩睇法？