經典遊戲《Final Fantasy VII》（FF7）嘅重製版第二集《Final Fantasy VII：Rebirth》上週發售，相信唔少玩家於過去呢個週末都好用心咁玩緊，同時亦想知道重製版同原版有咩分別。而近日就有報導指出，重製版刪去原版中一個非常經典嘅情節，就係玩家唔可以拎到蒂法條內褲啦！

話說於1997年推出嘅原版中，主角一行人會回到克勞德與蒂法小時候長大嘅村莊，玩家們亦可以進入蒂法嘅房間隨意探索。而如果玩家們去調查蒂法個衣櫃，克勞德就會獲得「ちょっと背伸びパンツ」（有點大膽的內褲）道具，原版中仲會出現一條粉紅色，但因為圖像質素太差所以驟眼睇有啲似塒肥牛嘅女性內褲圖片。由於呢個情節亦在太過惡趣味，而且相信所有玩家都會好想要蒂法嘅貼身物品，所以成為原版《FF7》嘅著名場景之一。

但黎到《FF7：Rebirth》，雖然玩家依然可以進入蒂法嘅房間、依然可以調查佢個衣櫃，甚至克勞德一邊打開仲會一邊講：「我真係控制唔到自己…」，但打開後玩家唔會獲得任何道具，而只會聽到蒂法及艾莉絲異口同聲嘅「最低！」（最差勁）。相反，如果玩家只係行近個衣櫃但唔打開，同行嘅巴雷特就會講：「時代變了，克勞德」。吐糟你班鹹濕仔之餘，某程度亦向玩家解釋咗點解要刪除相關內容。

資料來源：Inside-games