據著名業內人士Daniel Richtman爆料，Marvel Studios為降低風險及保障票房收益，未來將專注於保證熱門嘅項目，意味住《蟻俠與黃蜂女：量子狂熱（Ant-Man and the Wasp: Quantumania）》、《Marvel隊長2（The Marvels）》及《永恆族（Eternals）》等相對不受歡迎嘅作品唔會推出續集。

翻查資料，Marvel去年共推出《蟻俠與黃蜂女：量子狂熱》、《Marvel隊長2》以及《銀河守護隊3》三部電影，當中只有《銀河守護隊3》贏得票房口碑，而成本為2億美元嘅《蟻俠與黃蜂女：量子狂熱》全球僅收4.76億美元票房，《Marvel隊長2》情況就更為慘烈，花費高達2.75億美元製作，卻只收得2.06億美元票房，甚至成為MCU 33部電影中票房最差嘅一部嘅作品。

至於評價兩極嘅《永恆族》，雖然前早有傳正開發續集，Richard Madden及馬東石亦有望回歸，但考慮到電影票房表現，所以Marvel決定取消開發續集。

目前Marvel手頭上嘅電影項目分別有將於今年7月上映，被外界稱作「Marvel救世主」嘅《死侍與狼人（Deadpool & Wolverine）》，以及明年上映嘅《美國隊長4：美麗新世界（Captain America: Brave New World）》與《神奇四俠（Fantastic Four）》。