如果各位「褪色者」願意花費459美元，你都可以喺現實中擁有一把「暗月大劍」。

最近模型工作室Panda Studio推出《艾爾登法環》「暗月大劍」等比例樹脂模型，全長150cm，以半透明藍色劍身模擬月光充能效果，劍刃上亦有栩栩如生嘅冰霜花紋雕刻。模型分別有掛牆展示及可手持把玩兩個版本，目前已於網站We Are Anime Collector開放預購，售價為459美元，限量88件，預計2024年第三至第四季度出貨。

「暗月大劍」為歷代卡利亞女王贈予給伴侶嘅大劍，同時亦係《艾爾登法環》九大傳說武器之一，外型華麗夢幻之餘，仲可以釋放出月光波攻擊遠距離敵人，係完成菈妮支線任務後所獲得嘅禮物。