迪士尼《魔盜王》系列即將迎來重啟，早前先話過「唔會等待某些演員回歸」嘅監製Jerry Bruckheimer近日突然改口，表示希望Johnny Depp能夠回歸，但前提係佢有足夠嘅話語權。

迪士尼目前正計劃重啟《魔盜王》系列，意味包括Johnny Depp在內嘅舊有班底將不會回歸，消息傳出後遭到大量影迷唾棄，紛紛表示「冇JD嘅魔盜王就唔係魔盜王」。對此，監製Jerry Bruckheimer近日接受《Entertainment Weekly》雜誌訪問時解釋，佢本人都支持JD回歸，而都同對方傾過，可惜唔輪到佢話事：「今次係一部重啟電影，如果一切都由我決定嘅話，JD將會參與其中。我愛佢，佢係一個好朋友，一位出色嘅藝術家，並創造咗積克船長呢個角色。」言下之意，JD能否回歸取決於迪士尼高層嘅想法，但當然都要睇埋JD本人嘅意願。

據了解，迪士尼目前正同步開發兩部《魔盜王》電影，一部係由Margot Robbie主演、《The Flash（閃電俠）》編劇Christina Hodson撰寫劇本。而另一部就係由《魔盜王》頭四集編劇Ted Elliott，以及HBO神劇《Chernobyl》創作人Craig Mazin共同執筆。