去年上映嘅真人版《小魚仙》，因為搵嚟非裔女星Halle Bailey主演而被外界批評「政治正確」，為迎合社會風氣破壞原有設定，引起唔少迴響。近日1989年原版《小魚仙》導演亦發表個人看法，認為迪士尼需要調整創作方針，電影本身嘅娛樂性比傳達政治訊息更為重要。

曾為迪士尼執導《小魚仙（The Little Mermaid）》、《阿拉丁（Aladdin）》、《海洋奇緣（Moana）》等經典作品嘅資深導演John Musker，最近出席活動時批評迪士尼近年將政治訊息置於故事之上，忽略了故事本身嘅娛樂性。佢認為迪士尼需要調整一下創作方針，應該將傳達政治訊息放喺較為次要嘅位置，娛樂性及引人入勝嘅故事同角色先係重點，並指出好多迪士尼經典作品都冇話要帶出特定訊息，而係希望觀眾能夠全情投入其中。John Musker強調，佢咁講並非要求迪士尼捨棄各種議題，而係希望將創作具有代入感嘅角色視為首要任務。

除此之外，John Musker更特別批評真人版《小魚仙》，指出故事重點應該係Ariel與父親King Triton嘅情感，不過電影並冇太多著墨，而且CGI動物表情唔夠豐富，就連動物園入面嘅活生生動物都比電影更有表情。