Ubisoft新作《刺客教條：暗影者》（Assassin's Creed Shadows）因為以黑人武士作為主角，引起玩家社群廣泛爭議，反對者紛紛指責Ubisoft過度強調政治正確，就連Elon Musk亦發文表示：「DEI（多元、公平、共融）殺死了藝術」。最近《刺客教條》系列​​高層就透過傳媒回應Elon Musk嘅評論，認為對方只係煽動仇恨，非常可悲。

DEI kills art

— Elon Musk (@elonmusk) May 24, 2024

《刺客教條》系列副總裁兼執行製作人Marc-Alexis Côté日前接受外媒 「Game Fil」訪問，被問到點睇Elon Musk嘅批評時，Côté就表示自己有睇到個則貼文，當下心情亦非常不爽，甚至打算重新開通已經刪咗嘅X帳號回應，但最後都係選擇退一步海闊天空：「我電話有一個正念（mindfulness）應用程式，我做咗一啲正念練習，嘗試探索呢則貼文所引起嘅情緒。對我而言，Elon真係好可悲，佢只係煽動仇恨。我當時有好多三個字嘅回應浮現在腦中。」Cote認為反擊並唔會為佢帶嚟更多玩家，亦無助說服人們接受團隊想傳達嘅觀點。

至於點解會選擇黑人武士「彌助」作為主角，Côté就表示彌助嘅加入係Ubisoft魁北克團隊創作過程嘅必然結果，當團隊決定將遊戲背景定於日本封建時代後，彌助就不斷浮現在開發者腦海之中，而佢神秘又鮮為人知嘅身世正好給予團隊巨大創作空間，所以決定將佢納入主角之一。最後，Côté希望玩家們能夠以開放態度看待呢款遊戲，親自體驗完再下結論。