看門口必備嘅合家歡遊戲Mario Party再推新作《超級瑪利歐派對 空前盛會》，今次內容堪稱系列史上最豐富，總共有7張地圖、超過110款小遊戲，並支援20人線上對決，大家準備好銀包未？

據官方介紹，今集Mario Party遊戲舞台將搬到由多個島嶼組成嘅巨大度假勝地，玩法依舊係鬥收集多星星，同時加入更多全新特色道具及地圖，例如玩家能夠喺「令人興奮的購物中心」地圖中，在特價時段以半價搶購星星，「骰子快速道路」地圖入面會有可以一口氣前進40格嘅「音速骰子」，讓玩家有更多逆轉機會。

遊戲共有5張新地圖以及2張重製地圖，收錄超過110款小遊戲，涵蓋動作、益智、競賽等多個類別，部分遊戲更要用到揮動、傾鈄Joy-Con等方式操作，同親朋戚友一齊玩必然會爆出唔少笑料。

如果嫌唔夠熱鬧，仲可以Online同世界各地玩家進行20人線上對決，預計2024年10月17日正式登陸Nintendo Switch，日本實體版售價為7128円（約$352港幣）。