目前連載緊《一拳超人》嘅村田雄介老師一直以高超畫功而聞名，但漫畫家再厲害都唔可能無中生有、憑空畫畫，必須依靠觀察現實中嘅事物作參考。而村田雄介老師近來就於最新一期《一拳超人》單行本中，表揚佢嘅參考對象——佢個仔，準確啲講，係佢個玩健美比賽玩到拎到亞軍，真係好大隻嘅「大隻仔」。

話說早前推出嘅《一拳超人》單行本第34期中，村田雄介借用封面摺頁上嘅「作者的話」，公開表揚目前讀緊高中、曾經參加過全國高校生健美比賽，並於170cm以下組別拎到亞軍嘅兒子村田圭介，表示因為阿仔玩健康比賽嘅關係，所以佢從來都唔會缺乏活生生嘅參考資料。換言之村田老師於繪畫《一拳超人》角色，特別係畫到啲肌肉時，係會參考阿仔嘅體態，甚至好有可能係叫阿仔擺好甫士畀佢畫。

搞笑嘅係，將呢個「作者的話」放上X（Twitter）嘅「肉体美鑑真＠skeb募集中」帳戶，其實就係阿仔村田圭介本人，而且佢仲寫到：「漫畫家個仔竟然係玩健美運動員，真係罕見呢！呀，原來係我自己呀！」老豆用阿仔黎做參考，阿仔又睇返老豆畫嘅漫畫，甚至參加比賽時用嘅配樂都係《一拳超人》主題曲，村田父子嘅關係似乎相當好。另外亦有網民於留言處表示「（村田老師）連載《光速幪面俠》時出世嘅阿仔已經咁大個，真係令人感慨」，對此村田圭介表示，「是的，多得大家支持我先可以做到」。