講起瑜伽，麻甩佬如你我第一時間只會諗起瑜伽褲，甚至有人會覺得女性係為咗著瑜伽褲先去做瑜伽。但其實女性之所以熱愛瑜伽，係因為比起重訓等其他運動，瑜伽（據講）能夠協助塑造更纖瘦柔美、更符合女性審美觀嘅身體線條，簡單黎講其實都只係為咗靚。至於你話瑜伽有冇用呢？我覺得今晚介紹嘅呢位「滝 裕可里」就可以係一個好例子啦。

現年37歲嘅「滝 裕可里」乃係童星出身，小學開始就已經就讀演藝學校，13歲時就於音樂劇電影《Star Light》中以主角身份出道，之後就一直以演員身份活躍於日本影視圈。當中較為特別嘅係佢曾經於多套《幪面超人》出演不同角色，例如2011年佢就於OVA《幪面超人W RETURNS》中飾演「葛木葵」、2015年再於《幪面超人Ghost》第三集出演「白瀬マリ」，但當中最出名嘅，相信就係自2017年嘅《幪面超人Build》中飾演「滝川紗羽」一角，當年仲因此而獲得《週刊Playboy》拍攝寫真添。

到去年《週Play》因為要製作《幪面超人》特集而與「滝 裕可里」再次聯絡，而且仲問佢有冇興趣影多次寫真。而近年熱衷於瑜伽，甚至自己開埋個人教室做教練嘅「滝 裕可里」，就本住「展示自己多年來訓練成果」嘅心態而一口答應，於是就有大家睇到嘅一系列新寫真。講真，37歲、做咗人妻5年，但都仲可以Keep到咁嘅身段，唔好講女人啦，我睇到我都想去做瑜伽呀。

IG：takiyukari_official