HBO劇集版《哈利波特》似乎已經搵到「石內卜」人選！據外媒《THR》獨家報導，HBO已邀請近年在電視界炙手可熱嘅英國演員Paapa Essiedu出演該角色，但目前雙方尚未正式展開開談判。

隨住HBO劇集版《哈利波特》進入選角階段，近期陸續傳出多位要角人選，除咗早前有傳奧斯卡最佳男配角Mark Rylance有望出演霍格華茲校長「阿不思·鄧不利多」，今日多間權威外媒確認，HBO已邀請英國演員Paapa Essiedu出演另一名經典角色「石內卜」教授，但目前只係HBO單方面發出邀請，雙方尚未就合約展開正式談判。

今年34歲嘅Paapa Essiedu出身於英國著名劇團「皇家莎士比亞劇團」，曾出演《I May Destroy You（催命嬌娃）》、《Gangs of London（倫敦黑幫）》、《Murder on the Orient Express（東方快車謀殺案）》等作品，其中在《I May Destroy You》嘅精彩演出更獲得艾美獎及BAFTA獎提名。

對此，HBO並未正面否認或確定傳聞，只係表示當一切落實後就會正式公布：「我哋好高興呢部備受關注嘅劇集會引起好多謠言同猜測。但目前我哋仍處於前期製作階段，只有合約正式敲定後，先會公布相關細節。」