由台灣河洛工作室於1996年推出嘅《金庸群俠傳》，既有當時大熱嘅金庸小說為主軸，又有穿越、開放世界等當時非常新穎嘅元素，令佢成為當年唔少小男生心中嘅神級遊戲之一。事隔近三十年，近日中國公司圖森未來宣佈會用Unreal Engine 5，推出3A級嘅《金庸群俠傳》新作，更有趣嘅係，圖森未來嘅「本業」其實係整無人車嘅。

於官網之中，圖森未來嘅《金庸群俠傳》自稱為「（河洛）《金庸群俠傳》正統續作」、「我們是它，也不是它」，而且強調自己獲得明河社授權使用金庸作品。官網亦指新作用上Unreal Engine 5製作，「重現了金庸數部武俠小說的經典人物和120餘個經典場景」，整個遊戲地圖將有960平方公里大，並將包含黑木崖、桃花島等著名地點。

另外官網亦強調玩家將有非常大嘅自由度，有機會改寫小說中嘅重要情節，而且有多個分支結局。遊戲性上，圖森未來就話整個遊戲將有「200餘套武功套路」，仲請咗專業武打團體做動態捕捉，玩家可以自由搭配「招式」與「功法」，例如「降龍十八掌配上乾坤大挪移」。而且遊戲內仲有「真實的物理引擎」，「將對手摔到桌上，此時的桌子應聲破裂，而對手也將因桌子的碎片及反作用力而增傷」。

官網上嘅角色設定稿。個人猜測係張無忌同任盈盈。

場境設定稿

如果官網所講嘅都係事實，就即係圖森未來嘅《金庸群俠傳》，基本上就係河洛《金庸群俠傳》嘅現代技術重製版，而且解決咗當年河洛遇上嘅版權問題。但值得留意嘅係，官網上講明只係重現了「數部」金庸小說，而觀乎整個官網提到嘅武功、事件、地點推斷，故事將會以「射鵰三部曲」加《天龍八部》呢四部有明顯關係、發生時間亦較近嘅小說為骨幹。至於其他小說究竟係完全缺席，定係會以DLC、支線任務之類嘅方式出現，目前就係未知之數。

同樣係未知之數嘅仲有發售日期。成個官網都冇提過目前關發進度，亦冇講過發售日期。不過平台就確定係PC及主機。

資料來源：《金庸群俠傳》官網