Netflix今年作品陣容可謂相當精彩，除咗《怪奇物語》同《魷魚遊戲》即將迎來大結局，《星期三》、《今際之國的有栖》、《黑鏡》、《獵魔士》、《安眠書店》等人氣作品亦會回歸，睇嚟每月都有劇好煲！

Netflix日前在荷里活著名地標Egyptian Theatre舉行年度展示會，邀請到WWE巨星CM Punk與Rhea Ripley、《忘形水》導演Guillermo del Toro以及Ben Affleck等重量級嘉賓出席，向全球觀眾揭曉今年最新片單，並同步公開宣傳片。

不過片中就冇咩正片內容，而係講述一名女子喺辦公室發白日夢，然後突然升高至半空，穿越到Netflix影視作品世界，並順帶介紹今年即將播出嘅劇集及電影，包括《怪奇物語》第5季、《魷魚遊戲》第3季、《盲婚試愛》第8季、《黑鏡》第7季、《星期三》第2季、《今際之國的有栖》第3季、《眼鏡蛇道館》第6季第3部、《艾蜜莉在巴黎》第5季、《鋒迴路轉3》、《獵魔士》第4季等等。

順帶一提，人氣劇集《魷魚遊戲》第3季日前已確定將會在6月27日正式上架，唔知成奇勳可唔可以完成佢嘅計劃呢，大家又期待邊一部作品？