俗語有云「相由心生」，有時你真係不得不否認心地好嘅人，通常都生得特別靚仔靚女。好似今晚要介紹呢位「阪口珠美」咁，近來就為咗要好好照顧老年犬而去考咗個寵物看護資格，好明顯就係愛心爆棚；而佢本人又有一對又大又圓又清澈嘅明亮大眼睛，又好明顯係個靚女啦？仲唔係人美心善？

現年23歲嘅「阪口珠美」，其母親嘅血統可以追溯到鐮倉幕府第五代執權「北條時賴」，而佢小時候似乎亦過住非常唔錯嘅生活，所以自9歲開始學習芭蕾舞，直到14歲通過「乃木坂46」嘅3期生徵選前後先改學爵士舞。而自2016年加入團體之後，往後八年間佢一直都係主力成員之一，去年6月更推出首本個人寫真集，不過唔夠一個月後就正式退團，目前以藝能人、主持嘅身份活躍當中。

退團後嘅佢，雖然未有工作上嘅重大消息，但一舉一動依然受到日本媒體關注。例如去年年尾推出首本個人月曆，雖然唔係話特別性感或者搶眼，但依然獲得大量媒體報導。而今年初佢亦宣佈自己考到日本「愛玩動物（即係寵物）介護士」資格，據佢接受訪問時指，自己曾經同媽媽一齊照顧家中19歲高齡嘅愛犬，並感到自己嘅知識有所不足，所以先去考牌希望學習點樣更好地照顧高齡寵物。淨係呢份愛心都值得大家支持啦下嘛？

IG：tamami__official