曾拍出《第三類接觸》、《ET外星人》、《強戰世界》等經典作品嘅荷里活大導Steven Spielberg(史提芬史匹堡)，事隔多年再度挑戰外星人題材！據聞今次會以UFO為主題，環球影業已確定電影將於2026年6月12日正式上映。

據外媒《Variety》報導，呢部暫時未有片名嘅外星人題材電影由Steven Spielberg執導，並搵嚟《侏羅紀公園》1&2集編劇David Koepp共同撰寫劇本，而卡司方面就邀請到Josh O'Connor、Emily Blunt、Colman Domingo、Colin Firth及Eve Hewson等實力派演員出演。電影劇情細節相當保密，目前只知道係同UFO有關嘅原創故事。

電影原先定檔2026年5月15日上映，不過環球影業今日宣布延期一個月至2026年6月12日上映，估計係為咗避開其他大片，例如MCU大作《Avengers: Doomsday》（5月1日）同星球大戰衍生電影《The Mandalorian & Grogu》（5月22日）。至於原定2026年6月12日上映，由《奇異女俠玩救宇宙》導演檔Daniel Kwan與Daniel Scheinert執導嘅神祕新作，就因為今次改變而撤出檔期。環球影業並冇解釋原因，但相部係因為部戲仍處於前期籌備階段，劇本、片名、演員陣容都未公布，預計未來會重新公布上映日期。