MCU最新力作《美國隊長4：勇敢新世界（Captain America: Brave New World）》雖然在上映首周以1億美元票房強勢開局，但進入第二個禮拜後，票房卻大跌68%僅收2,830萬美元，按照目前呢個走勢，最終可能無法回本。

雖然商業大片喺上映第二周通常都會票房下跌，但由於《美隊4》口碑麻麻，令票房下滑幅度更加誇張，跌幅甚至拍得住2023年嘅《Marvel隊長2（The Marvels）》（78%）及《蟻俠與黃蜂女：量子狂熱(Ant-Man and the Wasp: Quantumania）》（70%）。但好消息嘅係，由於呢段時間冇其他大片同場競爭，所以《美隊4》就算第二周票房淨係得2,830萬美元，依然穩坐北美周末票房冠軍。與此同時，分析師亦預測電影有機會喺第三周繼續稱霸票房榜。

據票房網站Box Office Mojo數據顯示，目前《美隊4》全球票房為2.89億美元，其中有1.41億來自北美、1.48億來自國際市場。考慮到電影製作成本為1.8億美元，而且呢個數仲未計算宣傳費用，以目前表現嚟睇，要回本似乎有一定難度。