{ SKIP }
文:MenClub 艾力克  
POSTED ON 12 Mar 2025

迪士尼將於3月15日喺荷里活舉行真人版《白雪公主》首映禮,但今次唔會好似往常咁邀請大批傳媒到場隆重其事,只得攝影師同自家攝製隊負責現場報導。另外,有傳官方亦取消埋英國首映活動,以防「反覺醒」人士踩場。

據外媒《Variety》報導,真人版《白雪公主》將於3月15在荷里活El Capitan Theatre舉行首映禮,預計「白雪公主」Rachel Zegler及「壞王后」Gal Gadot將會現身。但今次唔會好似以往咁邀請幾十間傳媒到場訪問台前幕後,僅限攝影師同官方內部攝製隊負責現場報導。迪士尼並未就此發表評論,但報導認為同電影引起嘅多重爭議有關。

另一方面,英國傳媒《Dailymail》日前爆料指,為免遭到「反覺醒(Anti-Woke)」人士踩場,迪士尼已破天荒取消英國首映禮,而且宣傳規模亦縮減至只有幾場受嚴格控制嘅傳媒活動,藉此減少Rachel Zegler接受訪問嘅機會。

講開呢部電影伴隨嘅爭議,真係可以話一匹布咁長。除咗搵嚟擁有健康膚色嘅Rachel Zegler擔任「白雪公主」而被批評唔夠「白」,而Rachel Zegler本人亦因為多次發表出位言論而引發公關危機。例如公開批評原版動畫「老土過時」,以及王子跟踪公主嘅行為非常奇怪(weird)。又喺X上公開支持巴勒斯坦,但劇中演壞王后嘅Gal Gadot正正係以色列人兼撐自己國家,結果搞到兩派觀眾都揚言抵制電影。

仲有嘅係,特朗普當選美國總統後,Rachel Zegler曾喺IG發晦氣咀咒特朗普及其支持者「永世不得安寧」,雖然事後有道歉,但仇恨言論已得罪大批觀眾,所以唔難理解迪士尼會唔想佢亂接受訪問,免得再爆公關災難。

由George R.R. Martin創作嘅《A Song of Ice and Fire》(冰與火之歌)係過去30年中最著名嘅奇幻小說系列之一,其改編而成嘅HBO劇集《Game of Thrones》亦曾一度佔據「神劇」位置。不過其實原著小說自2011年推出第五 ...
hobby
【影視】《Witcher》原作者表示同情G.R.R Martin 指《Game of Thones》劇集係新書拖延原因
02 Jul 2025
繼2015年《The Martian(火星任務)》大獲成功後,原作者Andy Weir所撰寫嘅另一部暢銷小說《Project Hail Mary(末日聖母號)》亦被搬上大銀幕。荷里活型男Ryan Gosling將飾演一名初中老師,為拯救人類獨自踏上太空 ...
hobby
【影視】科幻電影《Project Hail Mary》公開首部預告!Ryan Gosling為拯救全人類獨自上太空
01 Jul 2025