各位今晚打算著咩瞓覺？係有套專用嘅睡衣追求儀式感？定係求其笠套T恤短褲舒適至上？定抑或係打大赤肋擁抱自然？但你又有冇諗過，你著咩瞓覺原來會影響到你與伴侶之間嘅性生活？近日就有學者指出，著「睡衣」瞓覺其實會抹殺你對伴侶嘅吸引力（反之亦然），好可能令段關係退化成「室友」。

話說外國組織「The Better Sleep Council」早前公佈咗一個關睡眠衣著嘅大型研究，於訪問咗超過2,000名受訪者後，得知當中有74%人每個星期會有幾日係著睡衣瞓覺，21%會間中裸睡，但不論選擇係咩，背後嘅原因都係為咗「舒服」。而外國媒體《Newsweek》就受此啟發，希望知道如果大家都追求「舒服」，會唔會影響伴侶之間嘅親密關係，所以就此事去訪問咗一啲兩性關係專家。

其中有20年「關係教練」經驗嘅Channa Bromley就指出，「睡衣」唔單單係一件衫，更加係一個信號。當一個人選擇著舒服嘅衫瞓覺，就代表佢哋放棄咗吸引、誘惑另一半。呢種改變雖然低調，但其實會影響整段關係嘅方方面面，事關「吸引係由阻力而生、由緊張而生，吸引需要對比。而舒服睡衣就「抹去咗能夠燃起吸引力嘅視覺信號，並將其替換成更安全嘅東西。」簡單黎講，就即係當你著起舒服但唔吸引嘅睡衣，另一半亦會自然了解到你無心「活動」，久而久之就會「相敬如賓」。

Channa Bromley指出，佢唔係叫大家唔好著舒服嘅睡衣，只係想提醒大家，如果你著緊舒服睡衣，就可能需要刻意將信號放大，先可以與伴侶保持親密關係。

而心理學、性學家Candice Nicole Hargons就指出，於性愛期間，視覺及觸覺嘅刺激尤為重要，特別係對男性而言兩者更加係一樣咁重要（女性則係觸覺行先，視覺第二）。換言之如果著上有吸引力嘅睡衣，就能提高另一半嘅欲望，反之則有可能抹去二人之間嘅火花。佢提議伴侶間可以直接詢問對方嘅喜好，又或者讓對方為自己挑選睡衣，以測試不同睡衣會唔會勾起對方嘅情欲，假若有效，更加可以將其納入定期活動，以激起更多火花。