LEGO與任天堂近年頻頻合作，繼《Super Mario》、《薩爾達傳說》、《動物森友會》以及即將推出嘅「LEGO Gameboy」後，今次驚喜宣布同超人氣IP《Pokémon》合作，預告2026年推出首款聯乘積木套裝，今次真係要準備定銀包砌返隻LEGO版比卡超喇！

最近LEGO宣布同Pokémon公司建立合作關係，並提前差唔多一年放風，預告2026年將會推出首款聯乘積木套裝，等Fans可以用Lego磚塊拼砌出心儀嘅寵物小精靈。雖然套裝細節尚未公開，但從預告可以見到LEGO版比卡超條閃電尾巴，睇嚟比卡超好大機會係首批打頭陣嘅產品。

由Mattel所推出嘅Pokémon積木套裝

其實現時市面上都有Pokémon積木套裝賣，由Mattel（美泰兒）旗下嘅Mega Construx及Mega Bloks系列推出，可惜銷情一直麻麻，或者因為咁，所以Pokémon轉投同世界首屈一指嘅積木玩具公司LEGO合作。