迪士尼下部真人版電影《史迪仔》（Lilo & Stitch）將於下月正式上映，目前業界非常睇好呢部作品嘅票房表現，預計在北美開畫頭三天即可突破一億美元票房。

有別於備受爭議嘅真人版《白雪公主》，真人版《史迪仔》自從公開首部預告後就廣受好評，甚至成為迪士尼真人版作品中第二多人睇嘅預告（第一係《獅子王》），錄得高達1.58億觀看次數。根據官方劇情簡介及預告片得知，今次呢部真人版相當跟足原著，並冇作出太大修改，同樣係講述史迪仔逃離太空船，意外降落到夏威夷同小女孩妮露相遇，並搞出連串笑料。與此同時，強霸博士同獨眼霹靂亦急急腳展開行動，勢要將史迪仔捉返上太空船。

隨住電影仲有一個月就上映，最近調查機構Quorum發布最新票房預測，估計《史迪仔》在北美上映首三日即可突破1億美元票房。若然預測成真，將會係迪士尼近年難得強勢開局嘅真人版電影。或者就係勝在劇情忠於原著，加上3D版史迪仔非常可愛，所以成功引起影迷嘅期待。

迪士尼真人版改編電影北美開畫票房排行榜（2015年起計）：

1.真獅版《獅子王》- 1億9170萬美元（2019年）

2.真人版《美女與野獸》- 1億7475萬美元（2017年）

3.《魔幻森林》-  1億326萬美元（2016年）

4.真人版《小魚仙》- 9557萬美元（2023年）

5.真人版《阿拉丁》- 9150萬美元（2019年）

真人版《史迪仔》改編自迪士尼2002年動畫《扮嘢小魔星（Lilo & Stitch）》，《迷你網紅實貝秀（Marcel the Shell with Shoes On）》導演Dean Fleischer Camp執導，原版動畫導演兼史迪仔配音員Chris Sanders再度獻聲，夏威夷童星Maia Kealoha扮演妮露（Lilo），《醉爆伴郎團（The Hangover）》Zach Galifianakis聲演強霸博士（Dr. Jumba Jookiba），Sydney Agudong飾演妮露姐姐蘭妮（Nani）、Ving Rhames飾演光頭先生（Cobra Bubbles），預計5月23日在美國正式上映。

資料來源：deadline、movieweb