荷里活巨星Johnny Depp日前接受《The Times》專訪時，罕有地提起與前妻Amber Heard嘅世紀官司。回想起嗰段爭議纏身嘅日子，JD直言自己好似MeToo運動前嘅實驗品，仲話如果當時唔挺身反擊，大家就會將所有虛假指控信以為真。

Johnny Depp同前妻Amber Heard在2016年離婚後，因為被對方誣告家暴，火速遭到荷里活割席，形象與事業一落千丈，直到2022年打贏官司，先能夠洗脫污名。審訊期間，兩人私生活被公諸於眾，網上直播更吸引了過百萬人同時觀看，但對JD嚟講，比起私隱曝光，佢更在意令大眾知道真相：「我知道我需要狠狠地剖開自己以證清白。每個人都同我講：『會過去嘅！』（即係等事情自然丟淡），但我唔相信，乜嘢會過去嘅？嗰啲呃咗全世界嘅謊言會過去？絕對唔會，如果我唔努力還原真相，就等於默認自己有罪。到時我嘅子女要承受一切，佢哋嘅下一代亦要承受，甚至我喺醫院探望過嘅小朋友都會受累。」雖然JD成功捱過了所有抹黑與謠言，但佢亦坦言：「老實講，呢一切都唔容易，但我唔在乎。我當時只係諗要戰鬥到最後一刻，就算最後淪落到去加油站打工都無所謂，反正我又唔係冇試過。」

除此之外，JD亦提到呢場官司令佢睇清晒身邊所有人：「有啲人，我而家諗到嘅有三個人名。佢哋曾經參加過我仔女嘅生日派對，仲攬住佢哋拋上天玩耍，但結果反咬我一口。我明白有啲人唔敢企出來，因為對佢哋嚟講，做正確嘅選擇係最可怕嘅事。」JD更點名批評合作咗30年嘅前經理人Tracey Jacobs，一邊賺佢錢，一邊係背後講佢壞話。並自嘲自己係MeToo運動前嘅實驗品：「我好似MeToo運動前嘅碰撞測試假人，嗰陣Harvey Weinstein嘅事情仲未爆出。」（JD在2016年被指家暴，而MeToo運動在2017年先席捲全球）