{ SKIP }
文:MenClub 艾力克  
POSTED ON 26 Jun 2025

由奧斯卡男配角Mahershala Ali主演嘅MCU新版《Blade》,早於2019年就宣布製作,但時至今日都尚未開拍,甚至連導演都未搵到。最近Mahershala Ali就向傳媒坦言,佢都唔清楚電影目前進展如何,但仍然好想飾演呢位吸血鬼獵人,仲話已經準備好隨時都拍得。

Mahershala Ali日前在新作《Jurassic World: Rebirth(侏羅紀世界:重生)》首映禮上,被外媒《THR》問到新版《Blade》進展如何時。佢就坦言:「我而家只能順其自然,盡力做好手頭上嘅工作。我剛剛拍咗一部名為《Your Mother Your Mother Your Mother》嘅電影,我喺套部入面有機會試下做特技同玩劍,而且係一個好正嘅故事,我非常期待。我當然希望新版《Blade》能夠成事,但我真係唔清楚Marvel嗰邊現況如何。我會持續尋找下一個優秀嘅角色。」同場,外媒《Variety》亦有問Mahershala Ali有關《Blade》嘅進度,今次佢就答得爽快好多:「你打畀Marvel啦,我已經準備好,同佢哋講我隨時都拍得。」

正如開頭所指,呢部新版《Blade》早於2019年宣布製作,Mahershala Ali仲喺2021年透過聲音短暫客串過《Eternals(永恆族)》片尾彩蛋。電影原定2022年開拍2023年底上映,但導演Bassam Tariq卻在開拍前一個月因「創意分歧」宣布退出,後來搵嚟新導演Yann Demange接手,點知遇上荷里活罷工潮被迫停工。罷工結束後,以為終於可以開工時,Yann Demange又突然唔撈導致製作再次陷入停擺。而且除咗導演,編劇亦至少換過7位。最後Marvel喺上年10月正式將電影從上映日程表剔除。

雖然《Blade》上映遙遙無期,但Marvel Studios總裁Kevin Feige就非常有信心,新版Blade總有一日會加入MCU,佢曾於去年11月表示:「我哋好有決心搞好《Blade》,我哋好鍾意呢個角色,亦好欣賞Mahershala Ali嘅演繹。大家放心,無論項目有咩改變,或許日程表有咩改動,我哋都會向觀眾交代清楚,你哋會及時了解最新情況。但我可以話畀大家知,呢個角色一定會喺MCU出現!」

資料來源:variety
繼《超級瑪利歐兄弟大電影》大獲成功及《薩爾達傳說》真人版電影計劃公開後,任天堂並無打算停低腳步,正準備將更多經典角色搬上大銀幕! 據外媒《IGN》報導,任天堂同環球影業最近為一部名為《Untitled Do ...
hobby
【影視】大金剛有望登陸大銀幕擔正主角?任天堂與環球影業註冊《Donkey Kong》電影項目
15 Jul 2025
《龍珠》嘅歷史悠久,代表相關嘅衍生作品,例如遊戲亦非常多。如果你一個Fans,或者會覺得要同時追N隻Game有啲麻煩,但有好多隻Game就同時亦代表有好多「週年紀念」及相關官方活動。好似近日《龍珠》嘅官方X繼今年2 ...
hobby
【動漫】龍珠手遊7週年 官方X抽悟空及菲利衣裝
15 Jul 2025