新海誠經典動畫《秒速5厘米》，憑藉細膩嘅情感描寫及唯美畫風，在無數影迷心中留下深刻印象。如今，呢部動畫將改編成一部兩小時真人版電影，並請來山崎將義重新演繹經典主題曲《One more time, One more chance（真人電影Remaster版）》，今年10月正式上映。

真人版《秒速5厘米》由奧山由之執導，SixTONES成員松村北斗飾演男主角遠野貴樹（幼年：上田悠斗、高中：青木柚），森七菜飾演澄田花苗，女主角篠原明里嘅人選暫未公布，只知幼年時期由白山乃愛出演。電影將保留原作三段式結構：「櫻花抄」、「太空人」及「秒速5厘米」，但時長將由原版嘅63分鐘延長至2小時，講述主角三段不同人生段階，所經歷嘅情感故事與迷惘。

從預告可見，電影重現出原作標誌性嘅櫻花飄落、火箭升空等經典場景，仲有兩位主角遠野貴樹（松村北斗飾）同篠原明里（白山乃愛飾）嘅童年片段，配上經典主題曲《One more time, One more chance》，瞬間將觀眾拉回嗰份青澀又揪心嘅回憶。電影將於今年10月10日在日本正式上映，而香港上映詳情暫未有消息。