如果話「故事」、「視覺元素」、以及「互動世界」係設計電子遊戲嘅三項本質，咁現時嘅AI其實已經算係做到前兩者——那怕係你同我都可以靠AI生成出似模似樣嘅故事、對白，或者角色。至於最後一項「互動世界」近日亦有新進展：Google旗下嘅世界生成模組「Genie」推出新版本，能夠將AI生成嘅虛疑世界維持得更好、時間更長。

圖片：Google

「Genie」係Google旗下DeepMind製作嘅環境生成AI模組，最早於2023年推出首個版本，可以依據用家提供嘅提示詞（Prompt），即時生成一個可以於其中自由走動、互動，同目前遊戲非常似嘅3D世界。而去年年尾時推出嘅「Genie 2」，就進一步可以用圖片黎取代提示詞。

不過Genie到目前為止嘅限制亦相當明顯：即使係「Genie 2」生成嘅虛擬世界都只可以維持10至20秒，而且入面嘅物件及環境相當低清（只有360p）。最大嘅問題在於Genie 2無法記住自己生成出黎嘅世界、又或玩家與世界互動後嘅結果，換言之假設玩家望住一舊石，擰轉頭再擰返黎之後舊石就會唔見咗。

不過以上問題都隨日前推出嘅「Genie 3」得到改善。據Google嘅部落格帖文，Genie 3唔單止能夠生成720p、每秒24幀嘅畫面，而且呢個虛擬世界可以維持數分鐘，換言之玩家可以稍為進行探索。更重要嘅係Genie 3加入記憶功能，會記得自己生成出黎嘅世界。雖然呢個「記憶力」都只係得短短一分鐘左右，但已經能夠避免玩家每次稍為轉換視角都睇到唔同嘢嘅問題。

Genie 3當然亦有其限制。Google就坦言目前玩家與虛擬世界互動嘅方法依然好有限，目前基本上只可以行行企企；同時目前虛擬世界中嘅可閱讀文字，亦必須由提示詞提供，否則就係典型嘅AI亂碼。距離能夠生成出一個可遊玩嘅完整世界仍然有段距離。

資料來源：Google