由Capcom製作嘅《Monster Hunter Wilds（魔物獵人荒野）》今年2月一推出就創下亮麗成績，短短三日內就賣出800萬份，一個月內更衝破1000萬份，成為Capcom史上銷售速度最快嘅遊戲。然而，之後嘅銷量就唔太理想，4月至6月期間僅賣出47.7萬份，反而前作《Monster Hunter Rise》銷量持續攀升，同期賣出38.9萬份。Capcom社長最近接受採訪時就提到，PS5價格太高係導致遊戲銷量停滯嘅主要原因。

Capcom社長辻本春弘日前接受《日經新聞》訪問時提到，《Monster Hunter Wilds》首月賣出1000萬份其實係公司內部目標，所以銷量算係符合預期，但如果要繼續推高銷量就有啲難度，事關現時嘅遊戲主機價格太貴。辻本春弘指出：「我哋發現PS5嘅『入場門檻』比預期高。PS5主機售價大約¥80,000（約HK$4,200），若然計埋連遊戲同PS Plus會員連機服務月費，實際起始成本差唔多要¥100,000（約HK$5,250）。對唔少日本同海外嘅年輕玩家嚟講，呢個價錢真係唔容易負擔。」為咗解決問題，佢提到公司正計劃推出促銷活動同其他推廣措施，希望可以刺激全年銷量，吸引更多玩家加入《Monster Hunter Wilds》嘅世界。

除此之外，辻本春弘更以Nintendo Switch 2為例子，強調價格親民對消費者好重要：「Nintendo Switch 2喺2025年6月以¥49,980（約HK$2,630，日本版售價）推出，市場反應比我哋預期好。雖然各地價格有差別，但呢個情況再一次證明普通消費者好重視成本。」不過，佢就冇提到《Monster Hunter Wilds》會唔會有Switch 2移植版嘅計劃。