或者喺唔少人眼中，年青人就一定係衝動、追求刺激，所以佢哋鍾意嘅影視作品都一定有啲打黎打去、溝黎溝去、瞓黎瞓去嘅青春元素。不過據美國UCLA「學者與故事中心」（Center for Scholars & Storytellers）早前公佈嘅一個最新研究，Gen Z其實非常唔鍾意浪漫愛情劇，甚至非常「純情」地認為現今影視作品中有太多性愛鏡頭。

圖片：《Euphoria》

據《Variety》報導，早前UCLA公佈最新一年「Teens & Screens」報告，揭示美國10至24歲年輕人對於各種媒體內容嘅偏好。當中嘅結果包括「入戲院睇戲」仍然係年輕人週末活動嘅首選，比起「去打機」及「去睇演唱會」更高，證明年輕觀眾入場意願相當高（有無呢個錢就另計）。另外報告亦指有48.5%年輕人鍾意睇動畫類作品，比起真人電影（42%）更高。

年輕人對於內容主題嘅傾向亦有特別之處。有32%年輕人表示自己想睇啲「同自己相關/相似」嘅主題，而非高大上嘅啟發性故事。同時有近六成（59.7%）年輕人希望故事係圍繞友情發展，猶其係異性之間嘅友情。反觀「愛情」類題材就跌到落尾三位置，就算真係睇愛情題材，超過六成年輕人都表示希望內容集中描寫男女關係中嘅友情部份，而非性愛場面；甚至有近半年輕人（48.4%）認為依家嘅電影劇集中太多性愛場面。換言之佢哋追求緊嘅係純愛呀！

《Stranger Things》被年輕人選為最喜歡的電影/劇集

明明係血氣方剛嘅年青人但對「性」無咩興趣，可能會令大家覺得有啲奇怪。但事實上過去唔少研究均指出Gen Z嘅性慾似乎比起其他年齡層要低得多。好似《Ladbible》於九月就曾報導過一個新嘅英國調查，發現18至26歲嘅年輕人平均一週僅做愛0.7次，比起27到43歲嘅成年人少一倍（1.4次），甚至比起60至80歲嘅「嬰兒潮」組別（0.9次）更低。

當然，Gen Z做愛次數少背後有各種原因，例如仍然同父母同住、收入低唔想約會等。但亦可以話佢哋面對嘅環境造就出低性慾嘅習慣，並反映於佢哋對於電視劇集嘅口味之上。

資料來源：Variety、LadBible