日本動漫影響無遠弗屆，而最能體現呢種影響嘅，就係你會於一啲同動漫風完全馬牛不相及嘅地方見到動漫元素。例如海洋生物學同動漫差得夠遠啦係咪？但近來日本琉球大学就引用名作《龍珠》中，將於沖繩海域發現嘅一條新品種魚命名為「超級撒亞」！

圖片：ITMedia

據《ITMedia》報導，呢條新品種屬於梵鰕虎屬（Vanderhorstia），係於石垣島外海嘅「黃昏帶」（即深度100m至300m嘅區間）透過垂釣採集，後來帶返實驗室後證實為之前從未發現嘅新品種。由於條魚嘅身上有淺黃色班點，魚鰭上更有非常搶眼嘅黃色條紋，睇落去同《龍珠》角色變身做超級撒亞人之後差唔多，所以其英名學名就被定為「Vanderhorstia supersaiyan」，亦即「超級撒亞梵鰕虎」。

至於日本學名，就因條魚嘅班點及花紋令人聯想到電力，故命名為「エレキハゼ」，亦即「電氣鰕虎」——你話點解唔改埋做「比卡超蝦虎」呢下？

研究團隊亦表示，連「超級撒亞梵鰕虎」呢啲外觀咁特別搶眼嘅都係之前未曾發現，證明該區海域嘅探索度非常低，未來應該能夠發現更多新品種海洋生物。話唔定遲啲又會有其他以動漫命名嘅新品種啦。

資料來源：ITMedia