V-Gauge嚴格上係取代咗《街霸4》入面嘅UC計，每當你被打中、或者成功使用每個角色特有嘅「V-Skill」，就會慢慢填滿。每個角色嘅V Gauge長度都有唔同，例如在試玩中見到「司令(M.Bison)」有三格，但春麗就只有兩格。

所謂V Skill嘅使出方法係中拳加中腳，即係取代咗上集嘅「Focus Attack」。而且除咗儲V Gauge之外，每個角色嘅V-Skill其實有實際用途。例如司令嘅V-Skill吸收入哋嘅飛行道具再反撃，而Ryu嘅係「Parrying」，即係繼承當年《3rd Strike》嘅系統，亦即係梅原大悟當年喺傳說中嘅《逆轉之鬪劇》用嘅技巧。成功使用可以無血擋下對方攻擊、減少硬直、仲順手儲埋V-Gauge，真係一次過滿足你三個願望。但呢隻梅原轉用角色會唔會整得太明顯呀Capcom？

咁儲V-Gauge黎做咩呢？原來只要消耗一格V-Gauge，就可以使出「V-Reversal」。只要喺對方攻擊時輸出前+三個拳/腳，就會打破自己嘅擋格硬直並反撃，而且仲可以繼續連技。文青嘅理解就同類似《街霸4》中剛拳嘅「當身技」。

而如果V-Gauge儲滿，玩家更加可以按下重拳重腳發動「V-Trigger」。簡單啲黎講，就即係爆氣。同樣地，每個角色嘅「V-Trigger」都有唔同效果，例如春麗嘅普通拳腳會變成多Hit(即係《4》入面陽(Yang)嘅超必)，而Ryu就會提升波動拳同昇龍拳嘅威力同暈值，如果用埋EX Meter仲會破防。而爆氣後嘅超必(今集稱為Critical Art)亦會由「真．波動拳」升級成為「電刃波動拳」。