圖片：Dailymail

阿仙奴爭咁個有咁上下把握力嘅射手就全世界都知，上星期英國唔少傳媒都傳阿仙奴會啟動華迪嘅買斷條款，以二千萬鎊買入呢位李斯特城嘅奪冠功臣，仲講到華迪飛去法國打歐洲國家盃前會有決定，不過而家都未有任何聲氣。不過，華迪係咪真係咁啱阿仙奴使，又好大疑問，簽到未必係好事，反而三輸。

圖片：telegraph

李斯特城打嘅戰術同阿仙奴有根本性嘅差別，技術上阿仙奴點都細膩得多，李斯特城好多時都係靠反擊或者放長波俾華迪用速度食糊。阿仙奴就反而打地面進攻同埋小組涉入。華迪差唔多整個職業生涯都係打英格蘭嘅低組別聯賽，呢啲小球會又點會打阿仙奴嗰種波？華迪去到阿仙奴，又要時間適應戰術，無可能期望佢一加盟就有李斯特城嘅表現。

圖片：express.co.uk

另外如果講成就，華迪除咗成為英超連續入球場數最多球員之外，幫李斯特城歷史性嬴到英超冠軍更令佢成為球會嘅英雄，留喺狐狸掛靴絕對係最佳嘅結局。你話阿仙奴有歐聯打咩？李斯特城都有；你話想跟名帥學嘢？雲尼亞里唔差雲加好多掛？唯一吸引就係有一個俾華迪去大球會嘅機會，但你話阿仙奴係咪真係幾見人見智，特別球會呢幾年成績都麻麻。或者錢呢？而家華迪週薪都有八萬鎊，我又唔係好信雲加會出到十幾萬鎊週薪搵個就快三張嘅球員加盟喎。

圖片：mirror

對我嚟講，李斯特城嘅新球季已經開始咗，因為雲尼亞里已經要面對四方八面嘅搶人攻勢，皇馬又傳想要簡堤，馬列斯又俾巴黎同埋阿仙奴睇到，個個係主力，到底李斯特城下季會點，真係睇雲尼亞里可唔可以留到一班好球員同埋買到咩人返嚟。而華迪留喺李斯特城點都係最好做法，阿仙奴本來就有能力搵個打法更合適嘅前鋒，華迪年紀唔細，仲要成二千萬鎊，想佢成為首席射手係有啲冒險。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、網台節目主持、演員、Menclub足球文章作家

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。