李羅渣 - 英格蘭難贏俄羅斯

POSTED ON 11 Jun 2016


歐洲國家盃尋晚終於揭幕，球迷們終於恨到，今晚星期六有香港人最愛嘅英格蘭對俄羅斯，牌面上英格蘭要贏好似輕輕鬆鬆，但俄羅斯都唔係省油的燈，三獅軍團未必贏到俄羅斯全取3分。

英格蘭今次陣容都算係三線平均，不過中場位置就弱咗少少，實力比世界盃時係有提升嘅。而友誼賽成績都非常出色，三戰全勝。只係英格蘭從來都係一到大賽就打回原型，戰術上鶴臣應該會參考今季利物浦嘅打法，無咁多傳統英格蘭嘅高Q大棍，英格蘭球員有無本事打得好呢種戰術，我有保留囉。

至於俄羅斯，同英格蘭一樣班底都係由效力國內聯賽嘅球員組成，當中有7位球員效力莫斯科中央陸軍，而領隊Leonid Slutsky同時執教中央陸軍，對球員了解同運用真係暸如指掌。技術上俄羅斯未必夠英格蘭好，但鬥體力就一定有優勢，到時就見英格蘭無選真禾特呢位掃蕩同控制節奏皆能嘅李斯特城中場入選，係幾咁錯誤。俄羅斯今晚係可以喺英格蘭身上拎到1分。

講返B組形勢，英格蘭本面上呢種有優勢，除咗俄羅斯，威爾斯近年實力不斷增強都唔係話贏就贏到，最有把握應該係斯洛伐克，想前兩名出線唔難嘅，但過程就肯定唔輕鬆啦。
李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。