成日聽到好多人話「足球唔應該同政治掛勾」，其實我都想，不過好可惜，唔好話各地政府好鍾意用足球去達到自己嘅政治目的，就連球員踢波踩住嗰塊草地，都一樣關政治事。因為梁振英政府而家就計劃，收返以七千八百萬興建，啟用咗一年多啲嘅石門賽馬會傑志中心嚟起公屋。梁振英今日回應就話，喺傑志未搵到中心嘅新地點之前，都唔會郁個中心，喂，多X謝晒喎。橫州同新界北都有好多官地架，點解係要用傑志中心呢個對香港足運咁有意義嘅地方？

就咁聽個名，你可能以為呢個中心只係俾傑志練波用，但呢個中心除咗俾傑志一隊同其他梯隊練習之外，亦都開放俾沙田嘅居民使用，更重要係傑志喺呢個中心搞咗好多針對青年人嘅免費足球課程，而學界班霸仁濟醫院董之英紀念中學舉辦嘅《職業足球培育計劃》都係喺呢度借用場地，而且香港嚟講，賽馬會傑志中心嘅設施都好完善，香港連FIFA認可嘅足球場都少之又少，賽馬會傑志中心對香港足運發展絕對有決定性作用。不過無計啦，梁生話體育發展無經濟貢獻呀嘛。

重視民生嘅你，可能你會話香港住屋問題咁嚴峻，政府要地都無法啦。不過，香港其實仍然係有好多閒置土地可以用，只係政府唔肯用甚至唔敢用。因為立法會議員朱凱迪被恐嚇同埋NBA巨星余文樂而為人熟悉嘅橫州就唔使講啦。仲有新界東北有個成170公頃嘅高爾夫球場，有好多跟進新界東北問題嘅組織都有建議政府收返部份土地嚟起公屋，但係政府就話建議不可行，因為呢個高爾夫球場一直有舉辦高爾夫球公開賽，對體育發展有貢獻。哦，有錢人打Golf就對體育發展有貢獻，易入屋嘅足球就無，明晒！

東方門神葉鴻輝就好嬲，話政府無承擔，09年香港喺東亞運贏到金牌就話會起多啲球場，最後香港到底多咗幾多球場，大家心照。之前香港對中國嘅世界盃外圍賽，除咗財爺之外無一個高官開口支持香港隊。成日和有啲大賽高官都會到場抽水，一講佢哋個名全場即噓唔係無原因。不過，足球對於團結群眾有好大作用，而家嘅政治環境，政府梗係會把握機會打壓足運，你懂的。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯 唔求發大達，最想成為有些少生活品味嘅偽文青