新正頭，先祝MenClub各位Gentlemen雞年心想事成財源廣進、心想事成、身體健康、女如輪轉，做球迷嘅支持球隊旗開得勝！

好啦，入正題！黎到月尾，轉會窗得返一個星期唔夠就閂，而唔少重要嘅轉會仍然未有定案。例如上季打到識飛仲做埋法國出線歐洲國家盃淘汰賽英雄嘅柏耶，今季為咗返前東家馬賽而搞到眾叛親離，連韋斯咸隊友都踢咗佢出球隊Whatsapp群組。當中最大原因係因為柏耶單方面宣布唔希望再為球隊上陣，而領隊比歷就將佢下放至預備組操練，兩邊火星撞地球，都唔知點收場。

柏耶季初已經同鎚仔續約，兼且表埋忠心話邊度都唔會去。之但係開季後韋斯咸成績唔好，柏耶就扭計轉會，難免令人覺得佢係大難臨頭各自飛。其實柏耶今次唔係想去巴塞皇馬，只係想回巢馬賽，仲要減人工都在所不惜，主要係因為太太希望三位子女可以返法國生活同成長，令柏耶呢次非走不可。其實韋斯咸都唔係唔放佢走，只係希望馬賽提出「合理報價」，因為馬賽出價2280萬鎊，同韋斯咸期望嘅3500萬鎊仍然有差距。

唔單止球會，柏耶連球迷同球員關係都差晒，上季柏耶用12個入球成功收服一眾鎚仔球迷，但自佢拒絕上陣要求離隊後柏耶就成為地底泥，先前比賽完結之後仲有球迷喺通道放低件柏耶波衫俾球迷踩住離場。至於隊友呢？先前入世界波幫球隊3-0贏水晶宮嘅前鋒安迪卡路爾就話球隊唔會無咗有一個球員就玩嘢玩完，球員喺更衣室好開心，就算領隊加操都好願意。而且近日有傳韋斯咸球員聚餐無叫柏耶去，仲踢咗佢出Whatsapp群組。話柏耶眾叛親離真係無講錯。

球員因為各種理由轉會本身唔係問題，人各有志，無話打工打一世嘅，不過好嚟好去就好緊要。而且柏耶本身係專業球足球員，處事成熟啲係必須。你想走，球會想袋多兩個錢都好應該，照常操練同盡全力比賽先係最穩陣。就算扭計都無話一定得，都要識權衡輕重。一來自己年紀唔細，二來自己夏天續咗約，又唔係大把球會爭住要，為咗返馬賽搞到自己變犯眾憎係好不智，如果柏耶私下同球會講打埋呢半年，夏天就返法國，咁就雙臝啦。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。