星期六晚讓我們重拾H Game的樂趣吧

文：MenClub 魏文青　　
POSTED ON 25 Feb 2017

過去嘅呢個情人節只有左手陪你過，係咪有啲空虛有啲寂寞有啲凍？係咪好想搵個人陪下自己，哪怕佢未必係一個真人？隨住科技發展，好多人都期望可以用VR、超像真人偶黎建立一段虛擬嘅關係，但你又記唔記得幾年前，又或者十幾年前，我哋係點樣同遊戲入面嘅數碼女生，建立一段面向螢幕，以左手為媒介嘅戀愛情慾關係？其實一切一切，都係由「包剪揼」同「麻雀」講起。

街機年代早喺上世紀80年代頭，日本街機就已經出現現今H Game(順帶一提，H係Hentai 變態嘅縮寫，雖然同中文字係一樣，但意思大致係指含色情意味，同中文嘅「變態」有程度上嘅唔同)嘅祖先：《野球拳》、《四川省》等等遊戲。值得注意嘅係呢啲遊戲中嘅H成份基本上係完成任務(猜贏電腦、過關)嘅獎賞，與遊戲本身嘅玩法冇咩必然關係。而且因為技術所限，當時嘅圖像都非常簡陋，但喺當時連鬧人「八婆」都係好大件事嘅年代，已經足夠令人男人興奮一番。

KOEI的黑歷史 Night Life 而講到以性愛本身為主題嘅遊戲，就要講到1981年推出嘅「Night Life」，製作商仲要為之後推出《三國志》、《野望》系列嘅KOEI(光榮)！當時係用PC-8001、PC8801等等古董級電腦運行，8色Display卡顯示。遊戲本身係以兩夫婦嘅性生活為題，主要選擇以咩體位同太太做愛，最終目的係要令太太懷孕，當中仲會涉及女性生理期等知識，所以有指佢其實唔係H Game，而係「幫助情侶婚後性生活」嘅實用嘢黎。 KOEI之後仲出過《団地妻の誘惑》同《オランダ妻は電気ウナギの夢を見るか？》兩隻H Game。前者講一個保險套銷售員點樣行服重重難關，戰勝幽靈、流氓，再將產品推銷畀大樓內嘅女住客們，成功嘅話就有「獎勵」；後者就係一個私家偵探去搵返三隻高性能性愛公仔嘅故事，由於啲公仔同人一樣樣，所以唯一分辨嘅方法就係不停搵女仔做愛做的事，而又因為公仔嘅技巧好高，而主角一高潮就Game Over，所以就要搵唔同嘅道具幫。基本上定下往後H Game嘅遊玩模式。

畫面質素大幅提升大家見到一面啲圖都知當年嘅畫面真係簡陋到不得了。但到咗80年代尾到90年代頭，隨住硬件嘅提升，H Game嘅畫面同玩法大幅進步。例如1989年推出，以問答方式進行嘅脫衣遊戲《電脳學園シナリオ1》，利用深淺色做出超過8色嘅效果，就算依家睇返都唔覺(太)老套。同期仲有AliceSoft嘅戰略RPG「蘭斯系列」嘅第一集「Rance -光を求めて-」，開啟咗未來25年、前後十隻Game嘅經典。同廠推出嘅《闘神都市２》亦大受歡迎。但更重要嘅係另一個H Game廠商「Elf」嘅掘起！由於《勇者鬥惡龍》大賣，當時整個日本遊戲界都吹緊RPG風，「Elf」食住呢條水推出RPG式嘅《龍騎士》，為H Game玩法打出一個新局面。之後嘅純愛《同級生》系列、痴漢始祖《臭作》系列，到現時已成經典嘅《龍騎士4》都一再大賣。可惜嘅係「Elf」無法再作突破，人才求去而往後新作銷售不佳，最後於上年正式結業。

我要的是故事！ ELF走下坡，第三大廠商F&C就希望以女僕為主題嘅《Piaキャロットへようこそ!!２》上位，可惜佢遇上嘅係成立三年嘅新廠商「Leaf」推出嘅《To Heart》。出色嘅人設，簡單易明但又觸動人心嘅劇本，令到「和女角們談戀愛」成為當時業界嘅主流。再加上後來Tactics推出嘅《ONE 輝く季節へ》、《One》製作組自立門戶後的《Kanon》、《Air》等等都係以劇本為主要賣點，而且多數係會令你喊嘅。大眾對於H Game嘅要求亦唔單止係洩慾，而係希望有豐富嘅畫面、音樂、人設、劇情甚至結局。再慢慢變成我哋依家見到嘅H Game。《同級生》系列《臭作》系列《夜勤病棟》系列《One》《Kanon》《Air》
《To Heart》
文青的H Game經歷作為一個男人，文青當然都有玩過下H Game，不過因為年紀同細個屋企冇電腦嘅關係，我係去到千禧年後先接觸H Game，即係以上講嘅我都冇玩過。而又因為唔識日文，唔好話理解劇情，連進行遊戲都有難度嘅關係，所以我通常都係上網睇人玩完之後Up出黎嘅CG圖。唯一一隻可以算親手玩過嘅係有英文嘅《The Hentai~SimGirl D.N.A》。不過印象最深嘅就係當年喺討論區見到有人放《戀姬無雙》嘅CG出黎，當時真係驚為天人。其實臨尾呢段寫出黎係想問下大家有冇仲Work嘅《戀姬無雙》漢化Seed，有生之年我想自己試下玩一次。唔該。