哥迪奧拿今季由巴塞簽入巴禾踢走赫特，結果巴禾大半季都甩甩漏漏，「換龍」之聲不絕於耳。喺哥帥嘅體系下最正路係需要一個腳下功夫唔錯、有傳送能力、可以組織攻勢嘅門將，呢個亦係現代足球趨勢，龍門唔再淨係「守龍」。其實歷史上都有唔少門將用其他方法走出禁區為球隊出力，例如前巴西國家隊門將、新任聖保羅領隊羅渣里奧。年齡3字頭嘅朋友咪扮後生呀，你一定會識呢位處理罰球同十二碼都有一手嘅門將，球員時期呢位門神總共入咗132球，係健力士世界紀錄大全入面入球最多嘅門將。

除咗係健力士入面入球最多嘅門將，羅渣里奧仲贏過唔少冠軍。雖然佢無好似其他巴西同胞一樣進軍歐洲，不過球員生涯只效力聖保羅一間球會，同樣足以自豪，「I love Sao Paulo, that is my life!」簡結有力嘅一句說話，絕對夠總結羅渣里奧球員生涯。1990年加入聖保羅青年軍，1992年正式為一隊上陣，後來除咗成為聖保羅隊長之外，佢仲係聖保羅史上10大射手之一。可能你覺得打咗千二場先入132球唔算誇張，但你又要諗下身為門將嘅羅渣里奧基本上只有12碼同罰球兩種入球機會，證明佢嘅死球把握能力都真係唔講得笑。

羅渣里奧嘅罰球力量唔算好強，不過勝在夠準，另一個特色係佢射罰球時助跑距離比較短，加上以前嘅足球比而家重，可見羅渣里奧腳下功夫都真係唔錯。香港睇巴甲就好難，如果大家認識呢位門將相信都係因為世界盃，但因為佢個年代巴西都有馬高斯、迪達、祖利奧施薩呢啲出色嘅門將，所以羅渣里奧喺國家隊只可以屈居後備。不過佢都為巴西上陣過15場，仲贏過2002年世界盃。至於喺球會，只要你講得出嘅南美洲錦標佢都拎過，絕對係聖保羅嘅生招牌，即使喺2015年退役，而家亦成為聖保羅領隊繼續貢獻球隊。

巴甲仲未開季，想知羅渣里奧教波掂唔掂就未知，不過要再見羅渣里奧呢類門將就應該好難。一來目前足球節奏快咗好多，一個唔該射唔入個波又無出界嘅話門將真係要跑得快過小明；二來有波射要走上去，射完又再走返自己禁區，對專注力唔多唔少都有影響。想睇門將用腳入波，相信只能夠上youtube啦。