以下將介紹一種新款安全套，讓閣下可以貼身體驗刺激又安全嘅「碰碰碰」運動，不過呢種安全套唔係畀你小弟弟著嘅，而係畀小弟你～著嘅。係呀！係由頭笠落你個身度呀，因為呢個就係任你點碰撞都冇事嘅碰碰球囉！

近兩、三年，碰碰球喺歐美愈見流行，成班人身穿巨膠波踢足球通處走，最好笑係腳都未掂到個波，雙方身上嘅碰碰球已經撞埋一齊，兩人向後彈開再碌地沙，場面笨拙又好笑。

碰碰足球由英國測量師Lee Moseley發明，Moseley發明目的純粹想人舒展筋骨兼大笑一番，所以冇設計特定玩法，總之要你互相激撞，入到龍門就攞到分。

碰碰球似足巨型保護罩，由頭蓋到落Pat Pat，加上球內繃緊嘅繩索令碰碰球比水泡更紮實，只要握實手把，無論你點樣360度反轉再反轉，仍安然無恙。

香港碰碰球協會創辦人之一Henry喺Youtube認識到碰碰球呢種新興玩意，覺得遊戲概念好特別，點撞都冇穿冇爛，於是購入幾個碰碰球，同班Friend搵個草地撞吓，發覺冇受傷之餘仲可以無限翻滾，感覺非常過癮，有傳統運動畀唔到嘅新體驗，於是大量引入，正式喺今年五月底開張做。

Henry讀環境科學出身，畢業後一直想創業，曾經同朋友搞過啲小生意，但成績都唔理想。據知碰碰球開業至今，booking不絕，預約期已排到聖誕，而碰碰球冇特別體能要求，基本上大人細路都啱玩。

遊戲類別

香港碰碰球協會嘅遊戲有三種，分別係「碰碰足球」、「關鍵時刻」以及「生還者」。

碰碰足球顧名思義就係著住碰碰球踢足球，由於目的就係要你哋喪撞對方，所以冇任何規則可言，將個波踢入龍門就有分。

關鍵時刻係每隊要爭相踩入「得分圈」內，對手就要將企喺「得分圈」內嘅敵人撞飛，成個比賽中喺「得分圈」內企得較多秒數嘅一隊為之勝利。

生還者就係要大家互相厮殺，撞出劃定嘅「生還」範圍外，最後留低嘅人就係Winner。

穿著方法

先將碰碰球手把向下放在地上

跪低身體塢向前，鑽入碰碰球內

雙手穿過肩帶，緊握手把

企返起身，禮成。

跌倒起身的方法

無論向邊個方向跌倒，只要面朝地下伏向前方，然後用膝蓋平衡，就可企起身。