愛之深，責之切，我利申一下，其實我都曾經係《Walking Dead陰屍路》嘅Fans，頭三季真係好精彩，一開場進入無望嘅喪屍世界，行去邊都係無希望，角色入形入格，心理描寫到肉，講到主角Rick同Shane由最好朋友到反目，講Shane由正人君子變到陰森小人，當年確實覺得係走在美劇界嘅高峰。不過，去到第七八季，收視唔掂，劣評如潮，究竟係咩嘢令到啲美劇一季不如一季？我就以《陰屍路》為例同大家解釋下！ 

(1)   主題悄悄改變

話明係《Walking Dead》，講嘅係喪屍橫行嘅世界，頭三季喪屍出場嘅份量多，好多讀者質疑故事由「喪屍vs人」完全變換成「人vs人」，一套講喪屍嘅劇，反映人性醜惡係好合理，但去到後期，喪屍好似只係過場，就難免令人覺得離題。另一套劇《13 Reasons Why漢娜的遺言》亦疑似有類似問題，明明上次同講晒嗰13個理由，第二季都冇理由再講？就算加咩劇情感覺都係怪怪哋，所以新一季網上劣評居多就係咁解。 

(2)   奸角一銀樣

第三季玩到第四季嘅大奸角Governor，相信大家都仲記憶猶新，我好想問，佢嘅聰明才智，佢玩弄人心嘅能力，同埋佢喺成套劇度起到嘅作用，係唔係同第六季玩到第八季嘅尼根非常相似呢？《龍珠》打完菲利，都打下人造人、斯路吖，跟住變到打布歐，布歐同菲利都好唔同喎。你玩來玩去都係用啲大奸角嚟殺下啲大角色，製造壓逼感，咁大家好易捉到你路架喎！ 

(3) 高潮位重覆

次次喺網上睇到《Walking Dead》所謂劇情高潮，無非就係有人死……啲主要角色死，當然係會令人心痛，但唔可以次次都用呢招，一套劇唔可以淨係靠有人死嚟引人睇落去，《Breaking Bad》唔會，《Game Of Thanos》唔會，呢啲神劇都係會有人死，但死唔係唯一嘅高潮，仲有你估唔到嘅劇情神展開，仲有角色嘅心理描寫，仲有好多好多嘢。淨係單靠呢個死嗰個死嚟製造必定嘅高潮，觀眾總有日會厭！ 

(4)拖來拖去得個吉

一個壞蛋拖足幾季唔係問題，問題係你唔可以令啲壞蛋不斷被打敗又出返嚟架嘛，Governor第三季明明已經衰咗，你就由佢去啦，係都要拖。永遠個劇情公式都係嗰啲套路，大奸角出場，打死人，主角畀人捉走冇晒計，矢志復仇，復仇成功嘅同時痛失所愛……大佬，你係美劇嚟架，唔係港漫呀！ 

小結：嚟緊第九季聽講主角Rick會死，會由Daryl擔正，嗱，你睇！又用角色死嚟做招徠，仲有冇第二招？睇嚟劇組唔打算有咩改善，讀者們自己看著辦，選擇睇定唔睇喇！