以前細細個成日睇高達喺太空上飛行、對戰，但你又有無諗過現實中高達都可以上太空？由日本宇宙航空開發機構(JAXA)與東京大學工學系研究院 Nakasuka Funase 實驗室合作嘅計劃中，即將喺2020年利用小衛星 G-SATELLITE 將動畫《機動戰士》嘅高達及馬沙專用渣古「紅彗星」模型送上太空，並喺東京奧運期間圍繞地球飛行。

日前東京奧運 One Team Project 公布，JAXA與東京大學 Nakasuka Funase 實驗室合作利用超小型衛星 G-SATELLITE 運載兩部高達及渣古模型上太空，而超小型衛星 G-SATELLITE 體積為10cm X 10cm X 30cm，衛星設有駕駛艙放置兩部模型，及裝上咗7個鏡頭。為咗能夠拍攝到地球及太空為背景嘅照片，駕駛艙仲可以向外延展。

今次嘅高達計劃為咗東京2020年奧運會而設，兩部高達及馬沙專用渣古「紅彗星」模型將會於2020年3月至4月期間，於國際太空站發射超小型衛星 G-SATELLITE 環繞地球，期間模型仲會透過眼部發出奧運五環顏色嘅光，及 腳底顯示屏發放支持東京奧運嘅打氣訊息。此外，兩部模型都使用咗特製材料及油漆製造，可以抵受極端環境。

來源：https://participation.tokyo2020.jp/jp/oneteam/08.html