你問依家啲後生，Netflix係做咩起家，我好肯定十個有九個都答唔出「租DVD」；我更加肯定十個有九個半都唔會知道曾幾何時有間嘢叫Blockbuster。呢個曾經於九十至千禧年代盛極一時、全球有超過9000間鋪嘅嘅DVD、錄影帶出租商，自2010年破產賣盤後就不停關閉分店，到今時今日，呢個地球上就得返位於美國俄勒岡州本得市嘅一間Blockbuster，基本上只係存在於大家嘅回憶之中。

但Airbnb就決定同呢一間Blockbuster合作，將其化身為出租客房，客人可以佔據整間Blockbuster，於梳化上重溫90年代嘅DVD及錄影帶「新作」，又或者回味一下當年嘅電視遊戲。店內亦有大量零食汽水提供，亦因應疫情而提供搓手液、消毒濕紙巾等衛生用品，等大家享受一個懷舊電影夜。

租金方面，一晚係4蚊美金，即係HK$30蚊左右。點解咁平？因為當年喺Blockbuster租隻DVD都係3、4蚊美金左右。

資料來源：Blockbuster